Incentivar a curiosidade dos teus fillos/as pola ciencia e a tecnoloxía é xenial. Xa falamos anteriormente de consellos para favorecer o contacto coa fauna e flora. Agora traemos unha selección de recomendacións sobre lugares e eventos galegos onde sementar o interese pola ciencia e a tecnoloxía. 

Eventos en Galicia

  • Mes da astronomía, na Biblioteca Pública de Santiago Ánxel Casal do 04/10/19 ao 31/10/19. 

A Biblioteca colabora co Observatorio Astronómico Ramón María Aller da USC e acolle durante o mes de outubro un ciclo de actividades adicadas á astronomía, entre as cales se atopan talleres infantís de astronomía. Haberá dous talleres, o primeiro está dirixido a nenos e nenas de entre 11 e 14 anos e será o vindeiro 7 de outubro. Para os/as máis pequenos/as prepararon outro que terá lugar o 28 de outubro, ambos os dous talleres precisan inscrición previa. Para ver máis información fai click aquí.

  • OSHWDem, no Museo Domus (A Coruña) o 9 novembro de 2019

Trátase dun evento tecnolóxico aberto a todos os públicos, de entrada gratuíta e sen inscrición. Acolle cada ano ducias de persoas que presentan os seus proxectos libres, ademais de ofertar talleres e competicións de robots. Se precisas máis información podes consultar este enlace.

  • Día de la Ciencia en la calle, en A Coruña o 9 de maio de 2020

O Parque de Santa Margarita acollerá de novo a estudantes, profesorado e entidades colaboradoras que mostrarán experiencias e proxectos científicos. O obxectivo é que os/as visitantes aprendan xogando coa ciencia. Para saber máis sobre este evento podes facer click aquí

familia_camina

Actividades permanentes en Galicia

Xa vos falamos anteriormente sobre actividades de ciencia e tecnoloxía en Santiago de Compostela cos principais eventos e museos. Sabemos que acudir a un evento nunha cita sinalada no calendario non sempre é sinxelo. Por iso incluímos recomendacións de lugares que están dispoñibles todo o ano

  • Museo da historia natural da SGHN, en Ferrol

Este museo atópase na Praza de Canido e conta coa maior colección de ósos de cetáceos de España, con exemplares expostos de ata 15 millóns de anos. Está aberto en inverno de luns a sábado de 9:30 a 13:30 h e de 16:30 a 20:30 h, os domingos e os festivos de 10:00 a 14:00 h. A entrada é de balde.

  • Naturnova, en Vigo

Para investigar sobre o Universo e o planeta Terra, recomendámosche este museo vigués que se atopa na rúa Velázquez Moreno, 20. O percorrido en Naturnova comeza co Universo e o Sistema Solar, para coñecer logo a Terra, os seus elementos e os seres vivos que a habitan. Podes visitalo de balde tódolos sábados pola tarde de 17:30-20:30, para obter máis información fai click aquí

  • MUNCYT, en A Coruña

O Museo Nacional de Ciencia e Tecnoloxía achega aos visitantes á ciencia dun xeito gratuíto. Nas súas instalacións podemos atopar un acelerador de partículas que data da década dos anos cincuenta, un xerador portátil de raios X de 1930 e unha cabina dun avión BOEING 747-256B dos anos oitenta. Este museo situado na Praza do Museo Nacional pecha os luns, recomendámosche que consultes o seu horario de inverno neste link.

Coruña,_MUNCYT

Estas son tan só algunhas ideas para levar a cabo en familia co obxectivo de pasar tempo de calidade xuntos/as mentres que aprendemos cousas novas. Isto favorece a unión familiar, xunto coa mellora da comunicación, polo que vos recomendamos empregar algún fin de semana realizando actividades como as destacadas neste post.