“Entendo o deseño e a vida dun modo optimista, divertido e dinámico. Sedúceme sacar as cousas do seu contexto habitual e a procura de novos enfoques”
Marcos Saavedra é graduado en Deseño de Produto pola Universidade da Coruña na Escola Universitaria de Deseño Industrial (EUDI) no ano 2005.
Tan pronto rematou os seus estudos traballou durante un ano como bolseiro na empresa Arturo Álvarez. En 2007 trasládase a Londres onde traballa no estudo de Héctor Serrano. Nesta época participa en diversos proxectos para empresas como Roca ou MUJI ademais de exposicións para o ICEX, como Spain Emotion ou Spanish Conversational 2.
Desde 2008 traballou nos departamentos de deseño de diversas empresas galegas entre as que destaca Arturo Álvarez, onde crea o departamento de materiais da compañía e participa no deseño e desenvolvemento da colección 2013, presentada en Euroluce, Milán.
No ano 2011 realiza, xunto con Enrique Saavedra, o proxecto Vermis, finalista do Fujitsu Design Award 2011.
Actualmente é co-fundador do estudo Vermis Project e director da delegación Española. Desde Vermis Project están a levar a cabo proxectos moi diversos onde o factor común é o alto grao de innovación e de creatividade.
Algúns deles son Designthinking.gal, VermisLAB ou a organización da 1ª Maker Faire da Historia de Galicia.
No ano 2015, xunto con Enrique Saavedra, interveu como TEDx talker divulgando o Movemento Maker.
